HOOS U JEED HOGAAMIYE IYO HOR U SOCOD BULSHO

Soomaalidu markey tageen dalal shisheeye oo ku caruur dhaleen, dhibaatadii ugu weyneyd oo soo wajahda waxa ay ahayd ismaan-dhaaf  ama is fahan-la,aanta waalidka iyo caruurta, sababta ugu weyni wexey ahayd waalidka oo aragti iyo aqoon kooban ka haysta hab-dhaqanka dunida maanta iyo ilmaha oo aragti duwan oo kore leh, waayo inta badan waalid soomaali ah waad garanaysaan markuu qurbaha joogo waa sida isagoo dalka jooga, meerta nololeedkiisu waa uun tii hore, afafka dalalkaa wuu yareeyaa ama ma barto, mana daneeyo arimaha ka socda dalka uu joogo, meesha ilmuhu dugsi aadayo, oo maalin walba wax cusub soo kororsado, waalidku waa halkiisii, sow markaa ma kala tegin labadoodu?!

Sidaas caruurta qurbaha & waalidkood kala yahay ayaa masuuliyiinta soomaalida maanta  iyo bulshadoodu kala yihiin, meesha caruurtu wax barashado dugsi iyo mid bog intarnayd  ama baraha bulshoba ku hawllanyihiin, guri walbana  idaacadaha iyo Tv-yada dunida lagala socdo,  masuuliyiinteenna(siyaasiga & oday dhaqameedka) badankood wexey ku hawllan yihiin madadaalada nafta sida shax ciyaareed, & fadhdhi makhaayadeed(fadhi- ku dirir), ama maan-dooriye sida qaad,qabyaalad & kuwo kale-qabyaaladu waa maan-dooriye waayo wexey koobeysaa qiimaynta qofka iyo xaaladda.

Marka sidee hogaamiyuhu aqoon la,aan u ogaan isbedellada, horumarka bulsho?

sidee u ogaanayaan rabitaanka bulsho?

sidee u ilaalinayaan xuquuq bulsho?

TARAGTIYO HOGAAMINEED

1- nafta maamul intaadan dadka maamulin.

2-marwalba waa laga tegi xilka."hadii cidi xil weligeed haynayso  kuma soo gaareen adiga"

waxa la doonayaa bulsho baraarujisa hogaankeeda iyo hogaamiye bila bulshadiisa!

Waxan arkayaa dedaallo goor hore fashilmay oo weli dhaqan gala, iyo hilinkii khaldanaa ee lagu tabar iyo tacabkabba beelay, maamullada soomaalida qaar baa tan iyo asaaskoodii dhibaatooyin bulsho ama siyaasadeed haystaan, dhabbihii odaygii hore ayey weli hayaan, ku fashilanyaa ama ku guulayseyyaaba.

Meeday qiimayntii isbeddellada, iyo horumarrada bulshada illeen waatan aqoon la yeeshay oo bulshadu xuquuqdeeda baratay, wexey tahay in hadii arin lagu dhaqaaqayo dhinacyo badan laga eego, oo sidey ukala mudanyihiin loo qaato, sida haddii qorshe B iyo T la sameeyo, oo haddii isku day ama qorshe  B socon waayo ama wax kharribo dib loo eego qorshahaas, ama qorshe T la qaato. Tusaale ahaan sidee u maaraynaa xasillooni darada bulshada iyo isku dhaca bulsho, waa la ogyahay dagaal dagaal ku xalli ayaa qorshaha keliya oo weligii ah,  lagumana baraarugo!.

Mudane la qabso waayaha cusub, la soco horu socodka bulshadaada, yaan lagaa tegin, baraarug goor hore  inta aan daad  kuu soo gelin, bal aan dhawrno maalmaha iyo wexey na dhahayaan!